લ્યો આ વરસ પુરું થયું.

 ઝાકળ ભીની એ ક્ષણ બધી, કંડારતા કંડારતા,

કંઇ તસવીરોમાં કેદ થઇ,લ્યો આ વરસ પુરું થયું.

 

અવસર મળ્યા કેવા મળ્યા,અફસોસ પણ ના થઇ શક્યો,

ઝખ્મો વગરનો ખેદ થઇ,લ્યો આ વરસ પુરું થયું.

 

જે સત્ય છે સચવાય નહીં,ને સાનમાં કહેવાય નહીં,

ભીરુ ભીતરનો ભેદ થઇ,લ્યો આ વરસ પુરું થયું.

 

છે જર્જરિત એ વસ્ત્ર પણ,વણતર બધાં સાબૂત છે,

આ ભવમાં આછો છેદ થઇ,લ્યો આ વરસ પુરું થયું.

 

ઋચા ઘણી નવતર જડી,નવતર ઘણાં મંત્રો મળ્યા,

આનંદ આખો વેદ થઇ,લ્યો આ વરસ પુરું થયું.

 

વિનોદ નગદિયા (આનંદ)