ઈચ્છા પડે તો આવી જા

બાકી બચી થોડી સફર,ઈચ્છા પડે તો આવી જા,

બીજા ભવની કોને ખબર,ઈચ્છા પડે તો આવી જા.

પીધાં હશે પાણી ભલે, જ્યાં જ્યાં પરબ દીઠી હશે,

ઝંખે તને પ્યાસી નજર, ઈચ્છા પડે તો આવી જા.

આકાશ પણ ઉજ્જવળ છે,ને માર્ગ પણ સીધા સરળ,

અજવાસ છે તારા વગર,ઈચ્છા પડે તો આવી જા.

લ્યો આવજો ત્યારે હવે....એ કોલ પણ ના લઈ શક્યા,

અફસોસ રહેશે ઉમ્રભર, ઈચ્છા પડે તો આવી જા.

જે હમસફર બનશે કદી,એની સફર માં આમ પણ,

"આનંદ" નહિ રાખે કસર, ઈચ્છા પડે તો આવી જા.

વિનોદ નગદિયા (આનંદ)